Lokaliteti Parahistorik Rigjeva në Gllarevë
Statusi
Lloji i Mbrojtjes: Nën mbrojtje të përhershme Data e Mbrojtjes: 1973
Lloji i Mbrojtjes: Nën mbrojtje të përkohshme Data e Mbrojtjes: 2012-2016
Historiku
Lokaliteti arkeologjik i Gllarevës ‘Rigjeva’ gjendet në qendër të fshatit Gllarevë (komuna e Klinës), në krahun e djathë të rrugës Prishtinë- Pejë, e shtrirë në tokat punuese të Rigjevës. Ky lokalitet është identifikuar rastësisht në vitin 1973. Gërmimet e zhvilluara arkeologjike në vitet ‘80 u përqendruan në dy lokacione njëra afër tjetrës, që rezultuan me zbulimin e dy nekropoleve; të varreve me varrosje të lirë dhe të konstruktuara me pllaka gurësh e me bazë të mbushur me guralecë, si dhe të varreve me djegie. Në aspektin kronologjik, ky lokalitet u datua në kohën e fundit të bronzit të mesëm. Në mesin e shumë varreve të hulumtuara aty, përveç materialit të pasur arkeologjik që ka shërbyer si inventar varri, veçohen disa shpata bronzi tipike mikenase, që më së miri ilustron faktin se shkëmbimet, gjegjësisht kontaktet me qendrat antike greke tashmë ishin konsoliduar.
